O presidente da Federación de Asociacións de Veciños de Lugo, Jesús Vázquez, avanzou a convocatoria de mobilizacións para reclamar da Xunta unha unidade de ictus para o HULA.

Este mércores, Vázquez incidiu en que se trata dunha demanda de “anos” que ve xustificada tanto polo número de casos como polas carácterísticas dunha provincia “envellecida” como Lugo.

“O número de casos xustifícao, o tela completa e non só no momento en que se produce o ictus senón tamén polas atencións posteriores que requiren as persoas que o sufriron”, aseverou.

Vázquez recalcou que, unha vez conseguida “a permanencia” dun neurólogo as 24 horas durante a xornada, “hai cousas que faltan” como un neurorradiólogo para localizar o trombo cerebral, unha figura que cualifica como “básica”.

O representante veciñal asegurou que cada ano se contabilizan uns 1.500 casos de ictus na área de influencia do HULA, cifra que “xustifican” ter esta unidade.