Catro persoas resultaron feridas tras producirse un accidente na autovía A-6, ao seu paso polo municipio lucense de Guitiriz, en sentido A Coruña, no que se viron implicados dous coches e unha furgoneta.

Segundo trasladou o 112 Galicia, varios particulares puxéronse en contacto coa central de emerxencias, sobre as 19,30 horas para informar deste accidente múltiple.

Ata o lugar, mobilizados polo Centro Integrado de Atención ás Emerxencias, desprazáronse axentes da Garda Civil de Tráfico, membros do GES de Friol, Protección Civil de Guitiriz e os servizos sanitarios.

Finalmente, os servizos sanitarios trasladaron a catro persoas feridas ao centro hospitalario de referencia. Mentres, o persoal do servizo de mantemento de estradas restableceu as condicións de seguridade da vía.