A Sección segunda da Audiencia Provincial de Lugo xulgará os próximos martes, mércores e venres, días 13, 14 e 16 de decembro, a cinco acusados de vender droga en varios locais situados na cidade de Lugo.

O caso procede do Xulgado de Instrución número 1 de Lugo e para eles Fiscalía solicita entre 3 anos e oito meses e 5 anos de cárcere pola suposta comisión de delitos contra a saúde pública, ademais de multas de ata 34.000 euros.

Tal como recolle o Ministerio público no seu escrito, os feitos remóntanse a 2013, cando un dos acusados rexentaba dous establecementos en Lugo nos cales o seu fillo, a noiva de leste e outra persoa traballaban como empregados (todos eles agora acusados).

“Os acusados posuían conxuntamente diversas sustancias estupefacientes que gardaban nos establecementos e nos seus domicilios para distribuílas a terceiros e cuxa venda e distribución proporcionaba ganancias a todos eles”, asegura Fiscalía.

O quinto acusado, pola súa banda, sería a persoa encargada de fornecer cocaína e haxix para a súa comercialización en Lugo, sendo interceptado transportando máis de 20 quilos de droga no seu vehículo.

Por todo iso, Fiscalía solicita 3 anos e 8 meses de prisión para o catro acusados encargados da venda da droga, así como unha multa de 34.000 euros. Pola súa banda, pide 5 anos de cárcere para o subministrador das sustancias estupefacientes, ademais dunha multa de 4.500 euros.