A alcaldesa de Lugo, Lara Méndez, avanzou en rolda de prensa que o Concello aspira a conseguir fondos europeos, a través do Ministerio para a Transición Ecolóxica, para a creación dun “gran cinto verde”, na contorna do Miño.
Trátase dun itinerario de tres quilómetros seguindo os cursos fluviais do río Miño, Rato e Fevedoira, “un verdadeiro conector ecolóxico peonil e ciclista entre a zona urbana e a contorna fluvial”, en palabras de Méndez.
“Perséguese tamén conservar o rico patrimonio medio ambiental que temos, o patrimonio natural tan valioso e querido polos propios lucenses e polos visitantes que veñen gozar da cidade”, apuntou.
Este proxecto nace do estudo de planificación e ordenación desa zona, que xa se fixo baixo a estratexia Lugo Life Biodinámico. “É unha planificación que xa se fixo e agora hai que buscar as vías de financiamento posibles”, remarcou.
