O Plan de Saúde Mental da Xunta reforzará o próximo ano a cobertura do Programa de Atención a Domicilio en Lugo, o que “permitirá facer unha continuidade dos coidados no domicilio para aqueles pacientes que saian dun ingreso e estean xa en proceso de recuperación”.
O conselleiro de Sanidade, Julio García Comesaña, sinalou este martes en Lugo que, entre as 61 novas prazas en materia de saúde mental que se crearán cos orzamentos da Xunta para o próximo ano, algunhas serán para reforzar este Programa de Atención a Domicilio.
Comesaña, que participou na inauguración dunha exposición feita por pacientes psiquiátricos no Hospital Universitario Lucus Augusti (HULA), resaltou que o Plan de Saúde Mental que a Xunta aprobou en 2020 prevé que se invistan máis de 83 millóns de euros e leven a cabo 241 contratos.
Ademais, insistiu en que xa se reforzaron con case 20 profesionais os equipos sociosanitarios de saúde mental que atenden ás persoas que están na residencia. Así, destacou a posta en marcha das unidades de prevención do suicidio nos hospitais públicos galegos e lembrou que en Lugo empezou a funcionar a finais do ano 2020.
O titular de Sanidade subliñou que a Xunta vai destinar 9,5 millóns de euros para concertar coas entidades do sector prazas nos centros de rehabilitación psicosocial e laboral, pisos protexidos ou unidades residenciais. Tamén reforzará as axudas para 60 programas desenvolvidos por estas entidades con máis dun millón de euros.
