Cun minuto de silencio os 25 deputados provinciais da Deputación de Lugo renderon homenaxe este martes a Cristina Cabo, a muller que apareceu morta a puñaladas na súa casa da Rúa Quiroga, en Lugo, o pasado domingo, antes de que dese comezo o pleno para a aprobación dos orzamentos.

Tamén serviu este minuto de silencio para conmemorar o 25 de novembro, data na que se conmemora o día internacional contra a violencia machista.

Tras coñecerse nos corredores do Pazo de San Marcos da detención dun home por este crime, o presidente provincial, o socialista José Tomei, lamentou “este crime horrible, doutra muller máis asasinada”.

“Temos que trasladar á familia o noso pesar, imos gardar un minuto de silencio na súa memoria. Era unha persoa nova, moi comprometida co movemento feminista. O ano pasado, ela mesma, participou nos actos do 8-M. Unha industrial do barrio da Milagrosa, non vivía alí pero si tiña alí un negocio”, esgrimiu, en relación á frutería ecolóxica que rexentaba.

Tamén a vicepresidenta, a nacionalista Maite Ferreiro, lamentou todo tipo de agresións. “Isto énchenos, unha vez máis, de tristeza porque o machismo segue en alza, as mulleres cada vez vemos que non se fai o suficiente para que unha muller non teña que estar sempre pendente de si alguén da nosa contorna vainos a asasinar. Queremos trasladar o noso agarimo e o noso afecto á familia e os amigos da vítima”, dixo.

Dende o PP, a presidenta provincial, Elena Candia, expresou “a tristeza profunda e a condena dun acto de violencia, que demostra unha crueldade que só merece repulsa”.

“Unímonos á dor de familiares e amigos e a todas as persoas que a coñecían, trátase dunha muller moi coñecida no barrio da Milagrosa e na cidade”, sentenciou a tamén candidata do PP á Alcaldía de Lugo.