O Concello de Lugo impulsa a creación dunha orquestra pensada para a mocidade, coa intención de “contribuír a continuar a súa formación musical e ampliar así os seus horizontes artísticos na cidade”. “Estamos ante os grandes profesionais que mañá mesmo asegurarán a continuidade das grandes orquestras, polo que queremos axudar a impulsar o seu enorme talento”, explicou a alcaldesa, Lara Méndez.
O obxectivo é crear unha agrupación musical estable en Lugo, denominada Terra Nova, dirixida a intérpretes de instrumentos de orquestra de entre 15 e 35 anos de idade. Ao fronte deste proxecto está o prestixioso músico bonaerense residente na cidade, Nicolás Ravelli Barreiro, pianista, director e docente, que conta cunha dilatada experiencia artística internacional e que lanzou varias experiencias de contrucións colectivas como o proxecto LiceOpera, en Arxentina.
Neste senso, a rexedora apuntou que este tipo de proxectos complementan a formación que xa se imparte desde a Escola Municipal de Música e a que tamén desenvolven outras agrupacións musicais moi asentadas en Lugo.
Así, desde este sábado, día 5, ábrese a oportunidade de que a mocidade interesada poida participar nesta actividade de xeito gratuíto. A formación desenvolverase todos os sábados, de 11.00 horas a 14.00 horas, na Casa da Xuventude. As persoas interesadas deberán inscribirse previamente en formulario.xuventudelugo.gal.
