A alcaldesa de Lugo, Lara Méndez, enviará unha carta ao presidente da Xunta, Alfonso Rueda, co fin de lograr o apoio do Goberno galego á candidatura da cidade para converterse en sede da Axencia Estatal de Saúde Pública.
Esta semana, os plenos do concello e da Deputación de Lugo aprobaron mocións de apoio a esta candidatura, que o goberno local quere agora que reciba a lombeirada da Administración autonómica.
“Agora mesmo ábrese un debate porque desde o Goberno central se aposta pola descentralización, que é bo e positivo; e ao final queremos todos acoller estas axencias”, manifestou Méndez este venres.
A rexedora apuntou que, en virtude das competencias que ten a Xunta en materia sanitaria, é necesario que a candidatura de Lugo reciba o respaldo do Executivo autonómico.
Así, Lugo propón a creación dunha comisión de traballo entre as administracións implicadas para traballar na candiatura, para a que pide o apoio “explícito” do presidente galego.
Por outra banda, lamentou que o PP reclame ao goberno local “o compromiso” con esta posibilidade “cando realmente quen ten realmente a capacidade de presentar a candidatura é a Xunta”.