O Concello de Lugo impulsou unha campaña con recomendacións para a cidadanía que ten como obxectivo de “vivir a celebración do Samaín libre de roles e estereotipos machistas” e “desenmascarar o machismo desde a infancia”.

A Concellería de Muller e Igualdade foi, do mesmo xeito que en Entroido, a encargada desta iniciativa que pon o foco na responsabilidade das familias á hora de compras os disfraces e que ten como obxectivo concienciar sobre que os disfraces poden ser utilizados indistintamente polas nenas e os nenos.

A campaña conta cunha serie de recomendacións como descartar disfraces que “supoñan unha hipersexualización” e elixir disfraces que “estimulen a imaxinación e desenvolvan a súa creatividade”. Ademais, recalcan que “o mellor disfrace é o que se fabrica coas mans”.

Así mesmo, o goberno local remitirá aos colexios do municipio estas recomendacións para que as distribúan entre o alumnado. Ademais contactarán con asociacións de nais e pais e difundirán as recomendacións a través das redes sociais e no programa municipal ‘Aprende Xogando’.