O tenente de alcalde de Lugo, Rubén Arroxo, xunto a outros cargos orgánicos e institucionais do BNG na comarca de Lugo realizaron unha viaxe en tren de Lugo a Parga para “reclamar un servizo áxil de ferrocarril que sirva para unir Lugo co resto de capitais galegas e estatais”.
A este respecto, Arroxo lembrou a manifestación convocada polo BNG para o 28 de outubro na que “se demandará un ferrocarril digno para Lugo baixo as siglas LQT (Lugo Quere Tren)”. A manifestación partirá, ás 20,15 horas da Praza Maior e finalizará fronte á Subdelegación do Goberno.
O nacionalista fixo alusión ademais ás firmas que entregaron ante o Ministerio de Transportes en Madrid, “máis de 4.000 rúbricas de veciños de Lugo que reclaman ao Goberno do Estado un compromiso real con Lugo”.
“Os orzamentos presentados non melloran a situación de Lugo, e deixan de lado a necesaria mellora das infraestruturas ferroviarias que necesita Galicia e sobre todo a posibilidade de ter un tren de proximidade propio que nos permita desprazarnos entre pobos e cidades próximas”, afirmou Arroxo, que engadiu que “Lugo segue á cola nos investimentos, especialmente no ferrocarril, onde as infraestruturas continúan sendo do século XIX”.
Pola súa banda, o nacionalista Felipe Rivas afirmou que “a chegada do Ave a Galicia, con case 30 anos de atraso sobre a data anunciada nun primeiro momento polo Goberno do Estado”, só supuxo que agora “sexa máis rápido ir en tren de Lugo a Madrid que de Lugo a Compostela”.
