O presidente da Deputación de Lugo, José Tomei Roca, renovou este xoves o compromiso coa Confederación Galega de Persoas con Discapacidade (Cogami), asinando co seu presidente, Anxo Antón Queiruga, dous convenios de colaboración a través dos que a institución provincial achegará un total de 73.000 euros para a atención dos usuarios.
Por unha banda, a Deputación destinará 35.000 euros a Cogami para colaborar co Centro de Atención Diúma Terapéutica Fingoi-Lugo, que actualmente atende a unha trintena de persoas. Ademais, achegará outros 38.000 euros para o taller prelaboral na comarca da Ulloa.
Noutra orde de cousas, José Tomei Roca tamén presidiu este xoves o pleno do Consorcio Provincial de Lugo para a Prestación do Servizo contra Incendios e Salvamento, no que se aprobou un orzamento de 5,6 millóns para o ano 2023, do cal a Deputación achegará o 50%.
Tal como indicou a administración provincial nun comunicado, estes orzamentos “garantir o funcionamento do seis parques do Consorcio, que contan con 20 efectivos cada un”.
Dos 5,6 millóns, un total de 4,5 millóns están destinados a facer fronte aos salarios dos traballadores, mentres que case un millón é para gastos correntes e 90.000 euros ao fondo de continxencia. Ademais, 57.000 euros é para investimentos.
Polo que respecta aos ingresos, proveñen das axudas da Deputación e a Xunta de Galicia, a partes iguais, ademais da Asociación Empresarial do Seguro (Unespa).
