A candidata do PP á alcaldía de Lugo, Elena Candia, trasladou aos veciños do barrio lucense de Albeiros que se chega á alcaldía local creará “unha oficina antiokupación para informar e asesorar aos afectados”.

Nunha reunión cunha representación dos veciños do barrio, Candia asegurou que porá “todos os medios” para actuar “canto antes” ante calquera okupación.

A popular indicou que ante “un PSOE que ata onte mesmo estaba de brazos cruzados e daba carta branca aos okupas acusando ao PP de Lugo de alarmista”, os populares lucenses mantiveron “unha postura clara en defensa da propiedade privada”.

Así mesmo, Candia tamén fixo referencia ás diferentes iniciativas que o PP presentou en “diferentes institucións do ámbito local, autonómico e estatal” co obxectivo de propor “medidas a favor da convivencia veciñal”.

A candidata á alcaldía de Lugo, asegurou que a cidade “leva anos padecendo okupacións de vivendas de maneira ilegal” e, continuou, “hai barrios nos que existe xa un problema de convivencia veciñal”. Por iso, afirmou que hai unha preocupación que “crece entre a cidadanía”. Unha cuestión que, engadiu, están a observar nas visitas que realizan aos barrios.