O 80% dos concellos lucenses sofren carencias en primaria e pediatría segundo o PSOE

No ámbito da sanidade a política da Xunta "tradúcese en falta de médicos, pediatras e persoal de enfermaría", cun impacto no ámbito rural "moi preocupante".

O secretario xeral do PSOE de Lugo, José Tomé Roca, convocou un encontro con alcaldes e portavoces municipais socialistas dos 67 concellos da provincia co obxectivo de analizar a situación da sanidade e da educación públicas.

Na reunión, Tomé Roca constatou que “o 80% dos concellos da provincia sofre a día de hoxe graves carencias de persoal en Atención Primaria e Pediatría”, unha situación “moi preocupante producida porque a Xunta non cobre nin as vacacións, nin as baixas, nin as xubilacións”.

No ámbito da sanidade, dixo Tomé Roca, a política da Xunta “tradúcese en falta de médicos, pediatras e persoal de enfermaría”, cun impacto no ámbito rural “moi preocupante”.

Neste sentido, dixo que “o PP pechou os centros de saúde de Castro, en Carballedo, de Parga, en Guitiriz, e de Castro de Rei”, á vez que aludiu a “situacións denunciadas polo PSdeG na Pontenova, Pantón, Abadín, Antas de Ulla, Ribadeo ou Barreiros, onde houbo só un médico para atender aos veciños, e tamén en Viveiro, onde estes días só houbo dous ou tres médicas, nun persoal de 10”.

No que se refire a situación educativa, José Tomé sostivo que “o PP recortou, nos dous últimos cursos, 1.500 profesores en Galicia, e suprimiu 96 prazas docentes en Infantil e Primaria este curso”.

Como contraposición, aludiu, a Xunta “recibiu fondos extra do Estado por importe de 827 millóns para reforzar os servizos públicos desde que comezou a pandemia”, dixo.

O PP PIDE “COHERENCIA”

Fronte a estas acusacións, o PP pediu “coherencia” ao PSOE, lembrando que esta semana “os socialistas votaron en contra no Pleno do Parlamento” de reclamar ao ministerio “poder formar e contratar máis médicos”.

Desde a dirección provincial do PP aseguran que “non hai agora mesmo na sanidade un problema máis urxente nin unha necesidade máis perentoria”. Por iso, explican,”debemos adoptar un compromiso conxunto para sacar adiante co máximo consensolas medidas de competencia estatal que teñen a chave para solucionar esta situación”.