A Policía Local de Lugo tramitou nas últimas horas case unha vintena de denuncias por diversas infraccións relacionadas coa seguridade viaria, a maioría delas (11) por excesos de velocidade.
Segundo informaron fontes policiais, ademais dos 11 condutores detectados circulando a máis velocidade da permitida, foron interceptados dous condutores que deron positivo nas probas de alcoholemia, aínda que por baixo do límite penal.
Ademais, outros dous homes foron propostos para sanción por conducir de forma temeraria, e tratar de eludir os controis policiais. A eles súmase outra persoa que foi sorprendida conducindo cun permiso de Venezuela, que xa non está en vigor.
Por outra banda, a Policía Local tamén tramitou denuncia contra un condutor cuxo vehículo non tiña seguro obrigatorio, e non pasara a ITV, polo que foi inmobilizado no depósito municipal. Así mesmo, foi sorprendido outro coche circulando sen ITV e un con placa de empresa sen o correspondente boletín obrigatorio que debe acompañar ás placas vermellas.
