A alcaldesa de Lugo, Lara Méndez, criticou este xoves –en declaracións aos medios– que o presidente da Xunta de Galicia, Alfonso Rueda, “impoña” as datas das reunións cos alcaldes das cidades galegas, algo que “é a primeira vez que pasa”.
“Tiven tres reunións con Feijóo cando era presidente da Xunta e sempre dabamos un par de datas e acordabamos. É sorprendente que se impoña a data de forma unilateral. A nosa disposición sempre é a de tender pontes e adaptar axendas, pero é rechamante que non nos dea outra opción. Entendemos que a súa axenda é complicada, pero a dos alcaldes tamén”, sinala Méndez.
Para Méndez tamén resulta “rechamante” que ás reunións, que sempre foron bilaterais, o líder da Administración autonómica “teña que acudir acompañado”. Pode ser isto unha demostración, comenta a rexedora lucense, “que non ten coñecemento da realidade do territorio”.
“É preocupante –continúa–, porque se fose unha persoa que acaba de chegar, sería entendible, pero é unha persoa que ocupou durante 13 anos o cargo de vicepresidente da Xunta”. “Os temas son dabondo coñecidos”, conclúe Méndez.
