O ciclo Lugo Son elixirá este sábado, 17 de setembro, ao cantautor revelación deste ano 2022. A fase final do concurso de alcance estatal celebrarase no club de arte e música Clavicémbalo e farao en honra á figura de Javier Krahe.
A primeira cita coa canción de autor en Lugo reunirá aos cinco finalistas do concurso, procedentes de diferentes partes do territorio español. Representates de Barcelona, Burgos, Cuenca, Sevilla e Madrid pelexarán sobre o escenario por facerse co título do Lugo Son. Cada cantante tocará, en directo, tres cancións, as mesmas coas que lograron facerse coa súa praza na final.
O organizador do evento, Jairo Varela, asegura que o nivel da preselección foi “altísimo” e non espera unha final “menos rifada”. Haberá un xurado profesional que avaliará “a melodía, a posta en escena, a música e, sobre todo, as letras das cancións” para establecer o veredicto.
Varela apunta que a participación “excedeu todas as expectativas”, de modo que elixir só a cinco cantantes para a final “foi moi complicado”. “Se todo vai ben o sábado, volveremos organizar unha segunda edición de cara o ano que vén. A idea é convertelo nun referente da canción de autor amateur”, comenta.
