UXT denunciou a agresión a dous vixiantes de seguridade no Hospital Universitario Lucus Augusti de Lugo (HULA) e pide material de protección como a entrega de chalecos anticorte. Nun comunicado, afirma que os levan reclamando “desde hai anos” despois de que outro traballador “sufrise varias feridas por arma branca que o inhabilitaron para exercer as súas funcións durante máis de 18 meses”.
“Non hai semana na que os servizos sanitarios non requiran a presenza do persoal de seguridade, sobre todo en urxencias e a unidade de psiquiatría”. “En ocasións os vixiantes sofren agresións verbais pero outras veces estas son físicas, como sucedeu neste caso”, apunta.
En concreto, explica que os dous vixiantes de seguridade foron agredidos cando compareceron na unidade de psiquiatríarequeridos polo persoal sanitario para inmobilizar a un paciente que se atopaba fóra de control.
“O enfermo golpeou con mobiliario da habitación un cristallaminado e cun anaco do cristal feriu ao vixiante nun costado, polo cal actualmente se atopa de baixa”. “O outro vixiante sufriu feridas nun ollo ao saltarlle unha esquirla do cristal”, especifica. UXT denuncia que a empresa adxudicataria do servizo “négase a facilitar os chalecos anticorte ata que unha sentenza os obrigue” e denuncia a “desprotección” dos traballadores.
