Axentes da Policía Nacional de Lugo detiveron a dous homes de 20 anos, un deles con antecedentes, acusados de pertencer a un clan que se dedicaba a ocupar vivendas para dedicalas á venda de droga.

O operativo púxose en marcha despois de varias queixas veciñais pola trasfega de toxicómanos nunha das principais rúas do barrio da Milagrosa.

Tras a investigación, a Policía corroborou que se trataba dun clan familiar, cuxa actividade era a venda de droga polo miúdo e que, para iso, ocupaban vivendas da cidade, que eran as utilizadas tamén para levar a cabo as vendas.

Unha vez determinado o modus operandi e demostrada a participación dos dous homes agora detidos, procédese á súa detención e rexistro da vivenda que estaban a utilizar para as vendas de droga, onde se incautaron varias doses de cocaína e material para manipular esta sustancia.