A alcaldesa de Lugo, Lara Méndez, acusou á Xunta de “privar” a Lugo de praia fluvial ou zona de baño pública na cidade, despois de rexeitar unha segunda localización no Miño que propuxera o Concello.
Méndez lembrou que “este proxecto se inicia no ano 2010“, “houbo que facer un cambio de localización e agora a Administración autonómica fala de que é a localización máis idónea cando foi precisamente tanto o goberno do PP na Xunta como no Goberno central os que non permitiron facer a praia fluvial na zona das Saamasas, que era a primeira intención”.
Critica que agora tamén se pon pegas ao segundo emprazamento, á beira da rotonda da N-V que dá acceso ao campus universitario. Neste contexto, afeou á Xunta “por pór trabas a un proxecto de cidade, un proxecto que ten unha gran demanda social máis aló dun compromiso político”.
“En aras de buscar a implementación desa infraestrutura, para que as veciñas e veciños de Lugo poidan gozar dunha zona de baño segura, coutada e con comodidade, é rechamante que agora se volvan a pór impedimentos polo Goberno galego, cando noutros lugares da provincia ou doutras provincias non os pon”, lamentou.
Lara Méndez apuntou que “será a Xunta a que terá que dicir por que quere privar aos veciños e veciñas de Lugo desa zona de baño pública”.
AFORRO ENERXÉTICO
Polo demais, sobre as recomendacións de Europa para o aforro enerxético, a alcaldesa de Lugo puntualizou que por parte do Concello: “Xa vén traballando nese aforro enerxético, como a implantación de paneis solares en edificios municipais, cando facemos obras de illamento ou cando potenciamos o uso do biogás”.
“O Concello de Lugo é un avantaxado nesa materia, onde se traballou moito. Levamos sete anos traballando en facer de Lugo unha cidade verde e sustentable”, asegurou.
