A Deputación de Lugo licitou por case 800.000 euros o contrato para a prestación de servizos básicos na residencia de maiores do municipio de Navia de Suarna. A portavoz socialista do goberno provincial, Pilar García Porto, anunciou dita licitación tras a Xunta de Goberno, e precisou que era “por un ano, e con posibilidade de prorroga por tres anualidades máis”.
Porto destacou que “unha semana despois de que o presidente (José Tomé) e o alcalde de Navia de Suarna (Pepe Fernández) asinasen nas propias instalacións do centro de atención a maiores o convenio necesario para poñer en marcha a residencia, lanzamos xa este contrato que é un paso determinante para abrir a residencia a principios de outono tal e como estaba comprometido”.
“É importante esa licitación do contrato para a prestación de servizos básicos na residencia de Navia e unha semana despois de que se asinase o convenio co Concello”, destacou. A portavoz socialista tamén comprometeu que “cando conclúa este mandato se contará con nove residencias públicas en funcionamento e xa con outras nove en diversas fases de tramitación”.
“NIN UN EURO”
García Porto aproveitou para protestar porque “o Goberno galego, a todo isto, non achegou nin un só euro, nin para a construción, nin para o funcionamento posterior”. “Todo o esforzo en canto á xestión e ao investimento está a recaer na deputación e nos concellos. Para nós é unha prioridade dar saída a unha reivindicación dos veciños da nosa provincia que precisa destes servizos”, sentenciou.
Na mesma reunión do goberno provincial aprobouse adxudicar por 95.000 euros “o contrato para a construción dun centro de transformación eléctrica” para a residencia do municipio de Becerreá. “Trátase dunha instalación que non estaba contemplada no proxecto inicial desta residencia e que nos obrigou a consignar novos recursos económicos, así como elaborar un procedemento específico para poder facer esta adxudicación”, pormenorizou a portavoz.
