InicioPolíticaO Concello de Lugo aproba o seu plan xeral de urbanismo na...

O Concello de Lugo aproba o seu plan xeral de urbanismo na súa totalidade tras 24 anos de espera

O 5% que restaba por aprobar da PXOM saíu adiante co voto a favor de PSOE e PP.

PUBLICADA O

- Advertisement -

O Concello de Lugo aprobou a totalidade do seu plan xeral de ordenación municipal (PXOM), do que restaba por sacar adiante o 5% do documento, que recibiu luz verde por parte do pleno municipal este xoves grazas aos votos de PP e PSOE.

Despois de que a votación non saíse adiante no intento da semana pasada, o cambio de postura do PP foi clave para a aprobación da totalidade do plan, que queda pendente da ratificación da Xunta. O grupo do BNG, socios do PSOE no goberno, votou en contra do documento e Ciudadanos volveu optar pola abstención.

Tras absterse na votación de hai unha semana, os populares optaron nesta ocasión polo si, postura que a súa viceportavoz, Antonio Ameijide, xustificou como unha mostra da “política útil” da súa formación.

“Quedamos cun sabor agridoce porque aínda que é positivo dar carpetazo a este asunto, e suporá unha boa noticia para moitos lucenses, non podemos esquecernos de moitos outros cidadáns, con nomes e apelidos, que pola incapacidade e falta de traballo deste bigoberno durante esta eterna tramitación de máis de dúas décadas, viron os seus proxectos truncados”, declarou Ameijide, segundo recolle un comunicado de prensa.

Pola súa banda, a rexedora luguesa, Lara Méndez (PSOE), mostrou a súa satisfacción polo paso dado, que permitirá “dinamizar a economía da cidade”. “Lugo é cidadanía, para as persoas; e non as súas políticas de espectáculo que só lle compran os seus militantes”, aseverou a socialista en alusión aos populares.

Durante a súa intervención no pleno, a alcaldesa referiuse á disparidade de criterio sobre a PXOM explicitado entre os socios do seu goberno. Neste sentido, subliñou que PSOE e BNG teñen “un acordo programático” que se comprometen a cumprir de aquí ao resto de mandato, que finaliza nun ano.

En canto ao BNG, o tenente de alcalde, Rubén Arroxo, xustificou a postura do seu grupo como reflexo da “coherencia” da formación frontista durante a tramitación do plan xeral. “Continuaremos apostando por un modelo de cidade sostinible, que vaia da man coa realidade do concello e que sexa verdadeiramente últil para as veciñas e veciños de Lugo”, incidiu o nacionalista.

ÚLTIMAS

Os Andares, un proxecto de inmersión sonora para redescubrir os Ancares

Os Andares, un proxecto artístico-inmersivo sobre a memoria emocional dos territorios, presenta seis viaxes...

Suspendido o xuízo contra un home acusado de ameazar a dúas persoas cunha escopeta

O xuízo oral contra un home acusado dun delito de tenencia ilícita de armas...

Non sae adiante a iniciativa parlamentaria do BNG para frear a instalación de Altri en Palas

A comisión 8ª de Pesca e Marisqueo do Parlamento de Galicia rexeitou este martes unha proposición...

Un veciño de Melide sería o autor de varios incendios nunha mesma zona da Serra do Careón

A Garda Civil investiga a un veciño de Melide, de 33 anos de idade, como suposto...