O pai da nena Desirée asasinada pola súa nai en Muimenta, José Manuel Leal, confesou que se atopa “absolutamente tranquilo” ante a denuncia por supostas ameazas que presentou o noivo da súa ex parella, Ana Sandamil que foi condenada a prisión permanente revisable polo asasinato da súa filla.
Ao proxenitor da menor impútaselle un delito de ameazas e obstrución á xustiza, durante a semana que se prolongou o xuízo, polo que terá que declarar na primeira quincena de xullo.
O pai de Desirée asegurou que está “absolutamente tranquilo” e negou que se producise ningunha agresión cara á parella de Sandamil. “Estou absolutamente tranquilo. É xente que o único que ten é maldade. Despois de todo o sucedido que veñan con estas bobadas”, lamentou José Manuel Leal.
Por outra banda, Leal advertiu que “o único” que lle preocupa é que o Tribunal Superior de Xustiza de Galicia ratifique a condena a prisión permanente revisable emitida pola Sección Segunda da Audiencia Provincial tras o xuízo contra a nai e despois do veredicto de culpabilidade que expresou un xurado popular. “Iso si que me preocupa”, abundou.
O pai de Desirée confía que o Tribunal Superior de Xustiza de Galicia se pronuncie “canto antes”, aínda que estima que o veredicto final, tras recorrer a sentenza Ana Sandamil, “salga no mes de xullo, cara a finais”.
“Espero ter todo iso resolto no mes de agosto. Que ese monstro (como se dirixe habitualmente á súa ex parella) siga coa prisión permanente revisable, que é o máximo estipulado por este país, que se siga mantendo polo TSXG”, abundou.
O crime de Desirée produciuse o 3 maio de 2019, o venres en que a pequena se ía co seu pai dentro do réxime de visitas que tiña asignado, na casa da nai en Muimenta, no municipio de Cospeito.
