Diego Anido Seijas, coñecido artisticamente como Diego As, está a piques de concluír un mural na comandancia da Garda Civil de Lugo, na Praza de Bretaña, coa imaxe dun garda aferrado a un neno.
O artista que realizou o grafiti de Julio César na rolda da muralla de Lugo, que finalmente foi premiado como o mellor mural do mundo, vai concluír o traballo que lle encargou a propia Garda Civil e confía en que leste mesmo luns, “pintando tres horiñas”, finalice a imaxe.
Diego As puntualizou que o significado o deixa “a xuízo do espectador; que pense o que queira pensar, que poden ser infinidade de cousas”. “Eu non quedo con ningunha en concreto, non quixen representar nada en particular”, advertiu. En todo caso, o artista urbano lucense si que quixo destacar o “labor humanitario da Garda Civil”, evitando outras etiquetas que, ao seu xuízo, non cre que se deban de producir.
14 METROS DE ALTURA
Diego As volveu a incidir en que “cada un que saque as súas conclusións do mural”, que mide uns 14 metros de altura e que se atopa na mesma entrada da Comandancia lucense. Así mesmo, insistiu no “gran labor humanitario” do Instituto Armado, aínda que repetiu que o “deixa á interpretación de cada un e cada un dirá unha cousa” sobre o mural.
“Non quería facer algo específico, aquí fixen o que adoito facer sempre e é que esteticamente sexa bonito e teña impacto”, concluíu o grafitero lucense. Desde que finalizou o debuxo do emperador Julio César, a Diego As non lle faltou traballo para outros debuxos xa non só na cidade de Lugo, senón tamén en Monterroso e noutros concellos da provincia.
