A Deputación de Lugo asinou este xoves cos sindicatos UGT, CC.OO. e CSIF un acordo polo cal impulsará en 2022 unha oferta pública de emprego (OPE) para a estabilización laboral cun total de 110 prazas que ata o momento estaban ocupadas por persoal temporal. A convocatoria tamén incluirá, a maiores, 19 prazas de acceso libre.
Así o avanzou o presidente da institución, José Tomé, tras o acto de firma deste convenio conseguido na Mesa Xeral de Negociación, conformada xunto coas forzas sindicais, polo cal este proceso estabilizador desenvolverase conforme á lei de medidas urxentes para a redución da temporalidade no emprego público impulsada polo Goberno central.
Tomé destacou que o acordo alcanzado beneficia a todos: “É importante para os traballadores e traballadoras que se van a beneficiar dunha maneira directa, importante para a Deputación de Lugo e a administración local porque avanzamos na estabilidade no emprego público, e importante para os veciños e veciñas da provincia, porque esta aposta pola estabilidade ten por obxectivo último seguir avanzando na mellora da prestación dos servizos públicos e o noso traballo de cooperación cos concellos”.
Nesta liña, o presidente insistiu en que sacar a unha OPE un total de 110 prazas radicará en “unha mellora significativa das condicións laborais de máis dun centenar de persoas”, un aspecto fundamental “para asentar e consolidar uns servizos públicos modernos, áxiles, de calidade e capaces de evolucionar de acordo coas necesidades da cidadanía”.
