Este xoves quedará aberto o prazo para solicitar unha das 400 prazas para participar nas 16 rutas sobre o patrimonio románico da provincia de Lugo que organiza a Deputación luguesa.
As saídas, que terán lugar os días 7, 8, 9, 14 e 15 de maio, foron presentadas polo presidente da Deputación de Lugo, José Tomé, nun acto celebrado este mércores na igrexa de Santa María de Toboada dos Frades, en Taboada.
Trátase da segunda edición do programa de actividades gratuítas organizadas pola institución provincial con motivo do Día da Transrománica, que se celebra o próximo 9 de maio.
Todo iso para “seguir apoiando o turismo, a hostalaría e o comercio, e, ao mesmo tempo, avanzar cara a un modelo turístico de calidade e sustentable, con capacidade para xerar actividade económica e emprego no rural”, sinalou o presidente lugués.
