As familias do dobre crime do Cash Record ocorrido en Lugo, que segue sen resolverse, preparan unha concentración ante a Audiencia Provincial de Lugo para o próximo 30 de abril, con motivo do 28 aniversario dos crimes de Esteban Carballedo e Elena López, por disparos no seu lugar de traballo (no polígono industrial do Ceao) onde o autor ou autores se fixeron cun botín de cinco millóns das antigas pesetas (30.000 euros).
A irmá dunha das vítimas, Isabel López, confirmou que van “retomar” esta protesta tras o alivio nas restricións pola pandemia, e despois de dous anos en que non puideron convocar nada pola Covid-19. López lembrou que despois de varios vaivéns xudiciais, a causa queda en mans da Audiencia Provincial que mantén como imputado ao “sospeitoso” da familia, un hostaleiro que contaba cun local no centro de Lugo e que agora reside en Burgos.
“Agora estamos en mans da Audiencia que é a que ten que decidir e a ver que fai. Estamos a esperar, primeiro dixéronnos dez días e xa van varios meses”, lamentou. Isabel López sinalou que o que pode saír da Audiencia “é se se fai xuízo oral ou a ver que outra medida poden tomar con el”, neste caso co investigado. “Suponse que a Audiencia está a analizar todo o que ten sobre a mesa e de aí tomará a decisión”, esgrimiu.
De momento, a irmá de Elena afeou que sigan “sen ningunha noticia” do xulgado e volveu a reiterar que “independentemente que nos conteste ou non a Audiencia, o 30” de abril levarán a cabo unha nova acción de protesta. No entanto matizou, a continuación, que se finalmente, por circunstancias, non pode ser o acto o día 30 levaría a cabo ao venres 29 de abril ou o luns 2 de maio.
