Grupo Leite Río informa de que a Axencia de Información e Control Alimentarios (AICA) impúxolle unha sanción por non facilitar a documentación requirida por este organismo, o que achaca a “un mero erro administrativo”.

Nun comunicado, replica á información trasladada pola asociación Agromuralla, de forma que deixa claro que “a empresa non foi sancionada porque os contratos non inclúan a información mínima que é obrigatoria de acordo coa Lei de cadea alimentaria”, senón por non remitir esa documentación.

Ademais, a sanción, imposta por “incumprir a obrigación de fornecer a información que se lle sexa requirida pola autoridade competente no exercicio das súas funcións”, foi recorrida por Leite Río por entender que “se trata dun erro administrativo, sen culpa nin dolo, polo que non debe carrexar unha sanción”. O recurso tramítase ante o Xulgado Central do Contencioso Administrativo, mentres está pendente a celebración da vista no próximo mes de maio.