O vindeiro luns, día 18, a Audiencia Provincial de Lugo acollerá unha vista para decidir sobre a prórroga da prisión provisional de Ana Sandamil, condenada a prisión permanente revisable polo asasinato da súa filla, Desirée Leal, un crime ocorrido en Muimenta en 2019. Será ás 11,30 horas cando todas as partes personadas manterán unha audiencia co xuíz para decidir se a condenada permanece en prisión permanente ata que o TSXG decida sobre os recursos presentados contra a sentenza.
Ana Sandamil, que permanece en prisión provisional desde os últimos días de maio de 2019, foi considerada culpable o pasado mes de febreiro por un xurado popular do asasinato da súa filla, Desirée Leal, cando esta tiña sete anos. Tras o xuízo, considerou probado que a muller asfixiou á menor mentres ambas durmían no seu domicilio en base a un plan preconcibido.
Ese mesmo mes, a Audiencia Provincial de Lugo condenou á muller á pena de prisión permanente revisable como autora dun delito de asasinato, coa agravante de parentesco, e a atenuante analóxica de alteración mental ou psíquica, aínda que de carácter leve. Hai unhas semanas, o seu avogado recorreu ante o Tribunal Superior de Xustiza de Galicia o fallo, polo que se fai necesario prorrogar o período de prisión provisional mentres se resolve este recurso.
