A Policía Local de Lugo interceptou na madrugada deste venres 18 de marzo un ciclomotor con aparencia de patinete que circulaba sen iluminación e cuxo condutor carece de carné e de seguro do vehículo.

Segundo relatou a Policía Local, durante a madrugada deste 18 de marzo efectivos do Grupo Operativo Nocturno, co emprego de vehículo camuflados e rotulados, estableceron diferentes controis de seguridade viaria para controlar o cumprimento da normativa de tráfico.

No marco deses controis, axentes detectaron ás 00,10 horas a circulación pola Rúa das Gardas dun ciclomotor “con aparencia de patinete”, resaltan as mesmas fontes policiais, que circulaba sen iluminación. Ao darlle o alto, os axentes comprobaron que o vehículo carece de seguro obrigatorio e o seu condutor non ten autorización administrativa para conducir por non obter nunca o permiso.

XUÍZO RÁPIDO

Por iso, foi trasladado á Unidade de Atestados do corpo, que instruíu dilixencias por un delito contra a seguridade viaria na modalidade de xuízo rápido.

Ademais, abriuse expediente sancionador ao condutor por circular sen seguro, sen iluminación, con pneumáticos en mal estado e tubo de escape sen silenciador de explosións e escape libre, tras o que o vehículo foi levado ao depósito municipal, onde quedou inmobilizado.