A Policía Local de Lugo interceptou a un condutor que cuadriplicou a taxa máxima de alcoholemia permitida despois de derrubar un semáforo de peóns na intersección de dúas vías. Segundo relatou a Policía Local, sobre as 4,10 horas deste 10 de marzo un equipo de Atestados da Policía Local desprazouse á rúa do Xenebro por un accidente de tráfico.
Os axentes comprobaron que un vehículo batera contra o mastro dun semáforo de peóns situado na intersección desta vía coa Avenida da Coruña, feito co que o derrubou. Ao observar que o condutor presentaba signos de embriaguez, foi sometido ás probas de detección alcohólica, nas que obtivo resultado positivo de 1,06 mg/l, que supón máis de catro veces a taxa máxima permitida. Por iso, os axentes tramitaron acta de atestado e instruíron dilixencias por delito contra a seguridade viaria na modalidade de xuízo rápido.
