A alcaldesa de Lugo, Lara Méndez, celebrou o cambio da empresa concesionaria da limpeza para a cidade despois de anos “cun sistema desfasado”.
A xunta de goberno aprobou este mércores a nova adxudicación, que se estende por dez anos e cun custo de case 118 millóns de euros. Méndez destacou que se “trata dun día importante para a cidade porque temos un sistema que quedou desfasado e estaba pouco dimensionado coa realidade de Lugo”.
“Era unha concesión, como se facía antes, de moitos anos e foise parcheando para dar cobertura nas necesidades”, subliñou. A rexedora resaltou que se produce “un salto cualitativo e cuantitativo, duplícase o investimento anual por este servizo e vanse a mellorar en moitos aspectos, como o cambio de colectores ou ampliando o persoal e recursos materiais”.
“Toda a infraestrutura móbil vaise a modernizar, máis aló dos propios colectores que serán máis accesibles e garántese a sustentabilidade”, pormenorizou.
Méndez sinala que se chega ata aquí “despois dun complexo trámite administrativo que o foi, porque lexitimamente as empresas pelexaron pola concesión ata o final, porque querían ser beneficiarias dese procedemento de licitación”.
Tras a aprobación en xunta de goberno, agora queda “arranxar todo o papelorio para asinar o contrato, e unha vez asinado iniciarase de inmediato, aínda que será un proceso paulatino porque non se poden cambiar os 4.000 colectores que se lles esixe de golpe”.
“Empezaremos polos lugares que estean máis deteriorados e de maior afluencia poboacional, e iso será o obxectivo que se marque a nova empresa, para que, de maneira progresiva pero sen pausa, se vaia facendo todo o que se recolle no prego”, concretou.
O prego de condicións “marca que son oito meses e un ano para o cambio de colectores e a renovación total do parque móbil, por tanto, iso é o que teñen que cumprir”, indica a alcaldesa de Lugo.
