O Goberno central financiará nove proxectos de eficiencia enerxética que se desenvolverán na cidade de Lugo e que suporán un investimento de 3,7 millóns de euros. O delegado do Goberno en Galicia, José Miñones, visitou este xoves a capital luguesa xunto á rexedora, Lara Méndez, para coñecer dúas das actuacións financiadas ao amparo desta liña de apoios do Instituto para a Diversificación e Aforro da Enerxía (IDAE).
Trátase da instalación de paneis solares fotovoltaicos para a xeración de enerxía orientada ao autoconsumo na piscina das Pedreiras e a rehabilitación enerxética do centro social de Fingoi. Ademais, o IDAE tamén financiará actuacións no centro social da Milagrosa, o edificio administrativo municipal, a piscina municipal de Frigsa, o edificio da Policía Local, a escola taller de Frigsa e a Casa do Deporte.
Os proxectos están financiados nun 80% por fondos estatais, mentres que o 20% restante corresponde ao concello. As estimacións das administracións implicadas cifran en 300.000 euros anuais o aforro en consumo enerxético, ademais de axudar a reducir as emisións á atmosfera
Durante o acto, Miñones resaltou a “estreita colaboración” que manteñen Executivo estatal e o goberno local de Lugo, que comparten o obxectivo de “seguir transformando a cidade” para “preparala para o futuro”. Pola súa banda, Lara Méndez incidiu na importancia de avanzar cara á redución de emisións, un camiño que se persegue con estes proxectos.
