O alcalde de Muras, Manuel Requeixo (BNG), asegurou que o goberno local dispón de “pouca información” sobre o proxecto da compañía Urbas, que prevé comezar este ano coa extracción da mina de feldespato potásico da canteira de Silán.
Este martes, tras o anuncio da compra da empresa, incluída nun comunicado con motivo dos seus resultados de 2021; o rexedor nacionalista manifestou que xa existen voces no municipio que se opoñen a este proxecto mineiro.
Segundo a compañía, as prospeccións realizadas ata agora apuntan a unhas reservas de once millóns de toneladas no xacemento, onde se extraerá feldespato potásico, que é un mineral fundamental para a fabricación de azulexos e baldosas cerámicas.
“Temos pouca información respecto diso”, lamentou Requeixo, que si chamou a atención ante a existencia de queixas veciñais “preocupados polo impacto que poidan ter as escavacións e o que se vaia a facer na mina”.
“Mantiven unha reunión con eles (dirección de URBAS) hai tempo e o que me trasladaron é que estaban a buscar a maneira e a forma de extraer ese mineral de aí e sacalo do concello para poder vendelo”, esgrimiu finalmente o rexedor de Muras, Manuel Requeixo.
