O presidente da Deputación de Lugo, José Tomé, outorgou este xoves un diploma acreditativo ás persoas que realizaron a formación para superar o concurso oposición de Secretaría e Intervención convocado pola institución provincial.
En total, foron nove as persoas que superaron este proceso selectivo e completaron a formación, que foi gratuíta e en formato en liña, segundo indicou a Deputación nun comunicado. Así, xa poden acceder aos postos de Secretaría-Intervención, Secretaría categoría de entrada e Intervención-Tesouraría categoría de entrada nas entidades locais da provincia.
José Tomé explicou que esta bolsa de emprego fora creada “ante os problemas que están a ter moitos concellos da provincia, sobre todo a de menos poboación, para contar con secretarios de entrada e secretarios interventores”.
O presidente da Deputación de Lugo destacou tamén que con este sistema conseguiron dous obxectivos: “dar solución a un problema que teñen os concellos e, ao mesmo tempo, abrimos oportunidades laborais para persoal funcionario de habilitación nacional na Administración Local”, sinalou.
