A Policía Local de Lugo denunciou a varios clientes e camareiros dun local de hostalaría da capital luguesa por non facer uso da máscara obrigatoria. Segundo informou a Policía Local, os feitos sucederon no marco dos controis realizados para a comprobación do cumprimento das medidas preventivas establecidas con motivo da Covid-19 durante a noite do martes ao mércores.

En concreto, as mesmas fontes policiais sinalaron que tramitaron denuncia por non facer uso da máscara obrigatoria a varios clientes do establecemento como os camareiros que atendían ao público tras a barra.

Respecto diso, a Policía Local destaca que o encargado do local cando foi requirido polos axentes para que se puxese a máscara para interactuar con eles “tivo que buscala durante un intre, xa que non sabía onde a tiña”, destacan as mesmas fontes.

Ademais, foi denunciado un local de lecer nocturno na rúa Galicia aberto ás 3,25 horas e con actividade excedendo o horario máximo permitido. E tramitou denuncia por fumar no interior dun local de lecer nocturno en presenza doutras persoas e sen facer uso da máscara obrigatoria, indican as mesmas fontes.