A concelleira de Cultura, Maite Ferreiro, animou a toda a veciñanza a participar mañá nas actividades coas que o Concello de Lugo celebrará o 21 aniversario da declaración da Muralla como Patrimonio da Humanidade.
As actividades terán lugar durante a tarde do martes 30, e “contaremos con poesía e música para celebrar esta data importante para todos os veciños e veciñas de Lugo”, concluía Ferreiro.
As actividades comezarán as 17:00 horas, o coro e ensembles de clarinetes do conservatorio Xoán Montes actuará na praza Pío XII, interpretando distintas pezas de Beethoven, Pachelbel ou Mozart, entre outros.
Por último, a partir das 19:00 horas, sairá da porta de Santiago un roteiro poético musical, organizado pola área de Cultura e a revista lucense de creación poética Xistral. Contará coa participación de distintos músicos da cidade, entre os que se atopan Yuri, Rulos, Cántigas e Frores ou a Volta do Agro, e con distintas persoas recitando poesía nas distintas paradas do Roteiro.
