O goberno da Deputación de Lugo ultima uns orzamentos para 2022 que ascenden ata os 100 millóns, un 8% máis que os do presente exercicio e que constitúen as contas “máis altas da última década” para a institución provincial.
Así o destacou o presidente lugués e alcalde de Monforte, José Tomé, durante a súa intervención este xoves ante a Comisión 3ª da Cámara galega, onde avanzou as principais liñas dunhas contas que o executivo provincial que comparten socialistas e nacionalistas espera aprobar inicialmente a finais de novembro coa vista posta na súa entrada en vigor co arranque do ano.
Tomé iniciou o seu discurso ante os grupos cun balance dos dous anos do seu goberno, “estable e sólido”, cando se atravesou xa o ecuador do mandato e cunha apelación á Xunta para que mellore as vías de financiamento ás entidades locais, cuxas carencias, di, foron destapadas durante a pandemia.
A Cámara galega foi o lugar elixido polo presidente lugués para anunciar o montante total ao que ascenden os orzamentos de 2022. Serán 100 millóns, oito máis que en 2021 nun incremento que Tomé atribuíu a “a participación dos tributos do Estado”, que se incrementan “en máis de 6 millóns”.
Articuladas ao redor de catro eixos (políticas sociais, cooperación cos concellos, apoio aos sectores produtivos e fomento da mobilidade), Tomé destacou do proxecto de contas a continuidade ao plan único, dotado con 22,5 millóns de euros; a construción de residencias de maiores ou a posta en marcha do Parque Central de Galicia.
