A Guardia Civil interceptou a un condutor, que obtivo resultado positivo na proba de alcoholemia, que circulaba a 157 quilómetros por hora nun tramo limitado a 80 no termo municipal do Corgo (Lugo).
Segundo informou o Instituto Armado, ás 23,31 horas do pasado 24 de febreiro unha patrulla de verificación da velocidade do Subsector de Tráfico de Lugo situada no quilómetro 491 da estrada N-VI no lugar de Laxosa, no termo municipal do Corgo, detectou a un turismo a 157 quilómetros por hora, a pesar de estar o tramo limitado a 80.
Unha vez detida a marcha do vehículo, os axentes puideron observar que o condutor, un veciño do Corgo de 43 anos, “presentaba evidentes síntomas de acharse baixo os efectos do alcol”, destacan as mesmas fontes.
Por iso, foi sometido ás probas de verificación da alcoholemia á que están obrigados todos aqueles autores dunha infracción, nas que obtivo resultado positivo de 0,83 miligramos por litro de aire expirado.
Por iso, o condutor pasou á condición de investigado como presunto autor dun delito contra a seguridade viaria pola taxa de alcoholemia e foi posto a disposición dun xulgado de Lugo.
Ademais, foi proposto para sanción á Xefatura Provincial de Tráfico “pola comisión dunha infracción moi grave ao Regulamento Xeral de Circulación”, concreta a Benemérita.
