Uns 3.000 veciños e veciñas da provincia xa solicitaron o Bono Impulso, unha iniciativa da Deputación de Lugo coa que a institución repartirá 17.000 descontos para compras en comercios, negocios de hostalaría e servizos na provincia. Con estes bonos a Deputación pretende mobilizar máis de 1,5 millóns de euros nos sectores máis afectados pola crise sanitaria.
Os bonos, que se poden solicitar ata o día 21 de xuño, poderán ultizarse nuns 700 comercios adheridos, cuxa listaxe está publicada na web da Deputación. Consisten en descontos nominativos, é dicir, levarán nome e apelidos de cada persoa, de 30€ para compras dun mínimo de 60€.
Todos o maiores de 18 anos empadroados na provincia poden solicitar o desconto a través da páxina web da Deputación ou presentando a documentación necesaria nas oficinas de Rexistro. Os bonos repartiranse de maneira equitativa seguindo criterios de poboación, condición dos solicitantes e por orde de presentación de solicitude.
De non esgotarse todos os bonos na primeira fase de solicitude, a Deputación de Lugo habilitará novos prazos e realizará sorteos entre aqueles cidadáns interesados en participar no programa.
