Ollando cara Estados Unidos e a Unión Europea faise evidente que a pandemia, cando menos sobre o papel, podería traer un cambio no tocante ao papel das administracións públicas á hora de garantir os dereitos sociais dos seus cidadáns. A crise da covid puxo á vista moitas das dificultades materiais sufridas polo conxunto da poboación dos países occidentais, entre elas a vivenda.
A cuestión da habitabilidade xera unha polémica que vén de lonxe no Estado español, Galicia e, en particular, Lugo; unha das cidades con máis vivenda baleira en todo o territorio estatal e na que, polos meses do pasado verán, golpeou con especial forza a cuestión das tan cuestionadas ‘brigadas de desokupación’.
A problemática, lonxe de quedar nunha serpe de verán, semella ter futuro de contar cunha mobilización social á altura do problema formulado. Cando menos esa é a visión que se destila da plataforma Movemento polo Dereito á Vivenda, que vén de se constituír en Galicia cun obxectivo claro e que, ata o momento, non estaba na primeira fila do debate público: como afecta o problema ás persoas maiores.
A SEGURIDADE NAS RESIDENCIAS
Case sempre que se analiza a cuestión da habitabilidade, o suxeito tratado adoitan ser os mozos; que, vítimas dunha das maiores taxas de desemprego xuvenil, non sempre poden acceder aos alugueiros das principais cidades. Porén, o Movemento polo Dereito á Vivenda fai tamén fincapé nas xeracións maiores, que, subliñan, tamén “teñen o dereito de goce a unha vivenda, a un fogar adecuado ás súas características”.
“O problema das alternativas residenciais vén de lonxe”, apuntan antes de recoñecer que “coa situación de pandemia fíxose evidente que estas non garanten o benestar das persoas e moito menos a seguridade”, subliñan en alusión ás mortes rexistradas nos centros xestionados por diversos grupos privados na comunidade galega.
“Cremos que é o momento de falar e debater como queremos ser coidadas, motivo polo que desexamos crear canles de comunicación e información dentro das nosas modestas posibilidades”, subliñan. Por iso veñen de lanzar unha serie de xornadas que terán lugar o día 10 de xuño no salón de actos da Deputación de Lugo e na que diversos expertos e persoas con contacto directo coa problemática darán a súa visión acerca dun conflito que, con accións como esta, podería comezar a gañar visibilidade.
