A Deputación de Lugo informou este domingo do peche ao público das súas dependencias a partir deste luns, despois de coñecerse dous novos positivos, un deles o da portavoz do PSOE e deputada de Réxime Interior, Promoción do Territorio e Turismo, Pilar García Porto, quen realizou a proba pola súa conta e comunicou o resultado ao Servizo Galego de Saúde (Sergas).
Ademais, o goberno provincial comunicou outro contaxio, concretamente o dun traballador do servizo de Novas Tecnoloxías, e atópanse á espera do resultado dunha proba realizada a un empregado do Centro de Artesanía e Deseño (Centrade) que tivo contacto cun infectado.
Dáse a circunstancia de que o pasado xoves transcendía o positivo do deputado da área de Promoción Económica e Social, Pablo Rivera Capón, o que levou a que se fixese un cribado a 30 persoas. Agora, tras os dous novos contaxios coñecidos, faranse outras 50 probas entre os empregados dos servizos provinciais cos que tivo contacto Pilar García Porto, así como a todos os integrantes da xunta de goberno.
De igual modo, dentro do protocolo contra a covid-19 na institución, o presidente, José Tomé, asinou este sábado un decreto que recolle un conxunto de medidas dirixidas aos traballadores públicos e á cidadanía. Entrarán en vigor este luns e entre elas está contemplado o peche ao público do Pazo de San Marcos e das dependencias provinciais.
TRABALLO PRESENCIAL “AO MÍNIMO”
Así mesmo, reducirase “ao mínimo imprescindible” o traballo presencial durante 15 días. Así, haberá teletraballo naqueles casos nos que sexa compatible e atenderase á cidadanía por vía telefónica ou telemática.
Con respecto ao persoal con funcións que non se poden desenvolver a distancia, farán o seu traballo de forma presencial a través dun sistema de quendas estables do 50 por cento dos efectivos de cada servizo. En todo caso, respectarase “sempre, co máximo rigor, as distancias entre os empregados e demais medidas de seguridade”.
Iso si, “todos” os empregados públicos provinciais “deberán permanecer localizables e deberán incorporarse aos seus postos de traballo presenciais” se así lles é requirido “por necesidades excepcionais do servizo”.
