A Fiscalía Provincial de Lugo solicita a absolución parcial de José Clemente López Orozco no marco da Operación Pokémon. O exalcalde socialista está investigado en dúas pezas do caso que instrúe a xuíza Pilar de Lara, por cohecho e tráfico de influencias. A instrucción dura xa seis anos e foi o motivo polo que tivo que renunciar a ser investido novamente coma rexedor de Lugo.
O escrito do Ministerio Público exime de responsabilidade a López Orozco polo suposto cobro de comisións na peza principal da Pokémon, correspondente ao servizo de grúa municipal concedido a Cechalva. Tamén está incluído noutra peza pola irregularidade da concesión da ORA á empresa Doal.
Así, segundo a Fiscalía, non hai indicios consistentes de que Orozco percibira as comisións ilegais. Así mesmo, constatouse que o patrimonio do exalcalde corresponde á súa vella ocupación e á da súa familia. Por outra banda, o escrito reflicte que non tivo por que participar na elaboración ou coñecer en profundidade as resolucións que asinou, e que se atopan baixo investigación.
O argumento da Fiscalía Provincial de Lugo apunta ao exconcelleiro Francisco Rodríguez Liñares e ao antigo funcionario municipal Javier Reguera, factótum e persoa encargada de recoller as comisións ilegais.
Orozco xa fora desimputado na Operación Campeón e na peza separada da Fábrica da Luz. Porén, aínda terá que responder pola concesión da ORA e pola construcción das Torres de Garañón. Así as cousas, foi a investigación da Pokémon a que lle obrigou a renunciar a ser novamente candidato á alcaldía de Lugo, presionado polos socios de investidura. Este feito deixou paso a Lara Méndez, entón vicepresidenta da Deputación.
Precisamente foi a actual alcaldesa a primeira en saír en defensa de Orozco tras coñecerse o escrito do Ministerio Público. Para Méndez, a posición da Fiscalía “demostra que Orozco non só non tiña responsabilidades penais, senón que tampouco tiña repsonsabilidades políticas”. Para a súa discípula, o paso atrás de Orozco “acentúa a xenerosidade e a altura de miras” de quen fora alcalde durante 16 anos. “A Xustiza, cando chega tarde, é inxusta”, rematou a rexedora.
