O alcalde de Outeiro de Rei (Lugo), o popular José Pardo Lombao, admitiu que no Concello están “moi preocupados” co brote na residencia DomusVi, na que hai 44 contaxiados, dos que 39 son usuarios e cinco traballadores. O brote, que xurdiu a pasada semana, con dous traballadores, levou a que os usuarios desta residencia non poidan abandonar as súas habitacións.
“Evidentemente estamos preocupados, estamos moi preocupados. É un tema moi importante que afecta a moita xente dun colectivo de moitas persoas que hai nesa residencia”, confesou o rexedor. Pardo Lombao confía “en que se estean tomando todas as medidas adecuadas por parte da residencia e por parte de Sanidade”. “Só queda esperar, dicirlle á poboación que tome as medidas adecuadas o mellor posible: uso de máscaras, gardar a distancia e lavar as mans”, lembrou e destacou que “esas medidas axudan a minimizar este tipo de cousas”.
O alcalde de Outeiro de Rei indicou que o Concello estivo desinfectando rúas e colocando dispensadores de hidrogel nalgunhas zonas públicas. Engadiu que dispoñen de máis dispensadores “para pór”.
