O pleno ordinario do mes de xuño do Concello de Lugo sacou adiante a aprobación do 5% restante do Plan Xeral de Ordenación Municipal (PXOM), que contou cos votos a favor de PSOE e PP e coa oposición do BNG, socio de goberno dos socialistas. Ciudadanos abstívose.

Agora, tras esta decisión, será a Xunta a que teña que dar o visto e prace á nova redacción do Plan, para a aprobación dese 5% restante, un trámite que se prevé que estea listo antes de finais de ano, cando a cidade de Lugo podería contar coa totalidade do seu ordenamento.

O concelleiro de urbanismo, Miguel Couto, mostrou na sesión plenaria a súa intención de “mirar en positivo e cara ao futuro”, onde a redacción do Plan restante permitirá que “70 núcleos rurais” conten co seu “plan” e se poida construír entre “1.000 ou 1.500 vivendas” para familias lucenses na zona rural, cifrou.

A aprobación desta mañá saíu adiante grazas ao apoio do grupo municipal do Partido Popular. O seu portavoz, Ramón Carballo, dixo que esta decisión se tomou por “responsabilidade e coherencia”, aínda que deixaron claro que non se trata dun “aval” ao Partido Socialista, se non “un apoio claro aos lucenses que viven na zona rural”.

O BNG, socio de goberno dos socialistas, votou en contra da aprobación porque, como dixo o tenente de alcalde, Rubén Arroxo, apostan “por un modelo de cidade máis sustentable e acorde á realidade de Lugo”. O outro grupo político municipal, Cs, abstívose na votación.

Fontes do goberno municipal quixeron saír ao paso de posibles fisuras no acordo entre PSOE e BNG, deixando claro que a “única excepción” no acordo de goberno entre os partidos era a relativa á do Plan de Ordenación, onde habería “liberdade total” de voto.