O Xulgado de Instrución Número 3 de Lugo, especializado en violencia sobre a muller, decretou este martes prisión provisional, comunicada e sen fianza para o home detido como sospeitoso de matar a súa parella o pasado venres en Lugo.

Segundo informaron fontes xudiciais, o detido, que se acolleu ao seu dereito a non declarar, está a ser investigado como presunto autor dun delito de homicidio no ámbito da violencia de xénero.

O arrestado foi trasladado ao xulgado pasadas as 11:00 horas deste martes, logo de que se lle tomase declaración na comisaría tras as dilixencias policiais. A investigación centrouse , entre outras, en analizar “diversos obxectos” achados no lugar do crime e na súa contorna, co fin de verificar se entre eles estaba a arma empregada no asasinato, supostamente a mans da parella da vítima.

O corpo da muller, Clara María Expósito, de 49 anos, foi localizado sen vida o pasado venres no barrio das Gándaras, en Lugo.