O Ministerio e a Consellería de Medio Ambiente acordaron enviar aves rapaces aos oito municipios da montaña de Lugo afectados por unha praga de ratas toupa que xa alcanzou máis de 1.600 hectáreas, segundo datos do Goberno galego.
Así llelo trasladou o conselleiro de Medio Rural, José González, ao secretario xeral de Unións Agrarias, Roberto García, e á secretaria xeral do Sindicato Labrego, Isabel Vilalba, nunha reunión mantida este xoves. Así mesmo, informounos de que técnicos avaliarán a problemática sobre o terreo durante o mes de febreiro para coñecer o número de roedores. A Xunta pedirá axuda a expertos asturianos en rata toupa.
Unha vez se coñezan os informes técnicos, o conselleiro comprometeuse a unha nova reunión cos sindicatos e os afectados para abordar medidas. Tamén se analizará a posibilidade de garantir o aprovisionamento de forraxes para as explotacións.
TERREO PREXUDICADO
O terreo afectado xa alcanza as 1.600 hectáreas, segundo a Xunta. Porén, Unións Agrarias estima que a superficie prexudicada supera nun vinte ou trinta por cento os cálculos do Goberno galego. Os concellos que sofren a praga son As Nogais, Baralla, Cervantes, Folgoso do Courel, Navia de Suarna, Pedrafita do Cebreiro, Samos e Triacastela.
