Varias entidades ecoloxistas e animalistas convocaron unha concentración este domingo en rexeitamento aos campionatos de caza do raposo, unha especie que consideran “clave” para a biodiversidade e equilibrio do ecosistema.

A protesta, que se celebrará ás 12:00 horas na Praza Maior de Lugo, parte da asociación Free-Fox, e está apoiada por AGAE, EQUO Galicia e a Plataforma pola Convivencia Ética coa Fauna Silvestre.

Nun comunicado, destacan que un gran número de organizacións científicas e ecoloxistas advertiron á Xunta “de modo reiterado” acerca do efecto nocivo das matanzas de raposos sobre á biodiversidade, sobre todo na proliferación de roedores.

Por todo iso, instan o Goberno galego a prohibir estas prácticas e terminar coa caza a esta especie “imprescindible para a saúde” do medio ambiente.