A defensa do que fose secretario xeral dos socialistas galegos, presidente da Deputación de Lugo e concelleira de Urbanismo na capital lucense, José Ramón Gómez Besteiro, presentou xa recurso contra o auto ditado pola xuíza Pilar de Lara que pon fin á instrución do chamado caso Garañón e propón xulgalo por sete delitos.

O letrado Cándido Conde Pumpido explicou a EFE que a defensa solicitou “a nulidade do auto” porque o dita a propia xuíza Pilar de Lara, cando existe unha “clara causa de abstención”, como é a sanción que lle impón o Consello Xeral do Poder Xudicial de sete meses e un día de suspensión, que implica a perda de destino en Lugo.

A defensa sostén nese recurso que o auto ten que ser nulo cando é ditado pola xuíza contra aqueles que denunciaron “as súas sucesivas irregularidades” e, por tanto, provocaron esa sanción por parte do Consello Xeral do Poder Xudicial.

Ademais, nese recurso, a defensa lembra outras circunstancias que tamén serían motivo suficiente para anular as actuacións, como o feito de que, aínda a día de hoxe, non se lle tivera “tomado unha declaración válida” ao propio Gómez Besteiro, dado que a única vez que compareceu ante a xuíza fíxoo sen estar presentes os seus avogados, quen acreditaron que tiñan que estar ese día noutro proceso xudicial.

Por outra banda, tamén lembra que nese auto no que a maxistrada pon fin ao proceso de instrución, impútalle a Gómez Besteiro tres novos delitos aos que non fixo referencia na causa até este preciso momento, o que ao seu xuízo é unha “represalia” polas denuncias que motivaron a súa sanción.

Conde Pumpido explica que, inicialmente, Gómez Besteiro fora imputado por “prevaricación, suborno, contra a ordenación do territorio e tráfico de influencias”, pero nese auto final a xuíza tamén lle atribúe delitos como “branqueo de capitais, falsidade documental e negociacións prohibidas a funcionarios”.

“É unha represalia en toda regra”, dixo o letrado, quen ademais aclarou que varios dos delitos que lle imputa a maxistrada ao seu cliente xa terían “prescrito”.

“Ela agárrase a un suposto suborno”, precisou Conde Pumpido, cando quedou acreditado na causa que a Gómez Besteiro “non lle regalaron” nin a súa casa nin tampouco a reforma que realizou no piso que comprara.

Fíxose, segundo o avogado, “unha investigación económica exhaustiva” e mesmo se achegou a escritura “do piso de arriba”, para demostrar que o expresidente da Deputación o pagara “mesmo máis caro”.

A defensa do exalcalde José López Orozco tamén ten previsto presentar ao longo do día de hoxe o correspondente recurso contra o auto da xuíza De Lara, que tamén propón xulgar ao que fora rexedor local de Lugo. EFE