O delegado da Xunta en Lugo, José Manuel Balseiro, mantivo este luns unha reunión de traballo co tenente de alcalde do Concello de Lugo, Rubén Arroxo, na que desbloquearon a instalación eléctrica do novo auditorio. Ambos os mandatarios destacaron que se chegou a “acordos”, entre eles sobre o novo auditorio da cidade, que estaba pendente dos últimos trámites de luz para empezar a funcionar.
A Xunta encargarase de asumir os trámites para conectalo á rede eléctrica e o Concello comprométese a facerse cargo da infraestrutura, para comezar a darlle contido.
Neste encontro falouse tamén das obras do colexio do Sacro Corazón, en cuxa execución se acordou realizar modificacións puntuais para buscar “unha maior eficiencia na actuación e o aforro de custos”.
A Xunta está a construír o edificio e ao Concello compételle a urbanización da contorna do colexio. Arroxo concretou, por exemplo, que as beirarrúas se farán “cando se termine a obra, para evitar que a maquinaria pesada que ten que desprazarse pola zona para as obras do colexio, cause danos nas beirarrúas”.
Doutra banda, Arroxo anunciou tamén que se iniciará o proceso para que a Xunta realice a cesión ao concello de San Eufrasio, “para que así se poida facer a rotonda de ligazón entre Fontiñas e a propia rúa”.
