O bebé supostamente maltratado polos seus pais en Lugo xa foi operado no Hospital da Paz de Madrid e está “a mellorar”. O cativo fora trasladado alí para ser intervido por un desprendemento de retina, operación que saíu “satisfactoriamente“.

Así o explicou a conselleira de Política Social, Fabiola García, que salientou que, desde que a xuíza asignou á Xunta a tutela do menor, a Administración galega velou “en todo momento polo seu benestar e polo seu coidado”.

Tras lembrar que o caso se atopa baixo investigación xudicial, a conselleira confirmou que o bebé “xa foi intervido” en Madrid dun desprendemento de retina e que a operación “saíu satisfactoriamente”. “Nestes momentos está a recuperarse e está coidado e acompañado”, explicou. Respecto da data prevista para a alta do meniño, Fabiola García instou a ser “prudentes”, aínda que aclarou que o bebé “está a mellorar”.

Finalmente, a conselleira pediu que se algunha persoa “coñece algún caso de malos tratos ou desprotección” dea “a voz de alarma” no Teléfono do Menor (116 111) ou nos servizos sociais municipais. Así poderanse pór en marcha os mecanismos de “protección” da Xunta.